لە جیاتی کێ ؟


 وەڵامێک بۆ گۆشەکەی رۆژنامەنووس (رێبوار کەریم وەلی) لە رۆژنامەی رووداو و هێرشە بەرگکراو و شاراوەکەی بۆ سەر سەرۆک بارزانی

سەربەخۆیی کوردستان وەک کاک رێبوار دەڵێت (نەغمە) ، نەغمەی ئاوازێک نیە کە لە بەرزترین ئاستەکانەوە بە تەنها ببیسترێت ، سەربەخۆیی و بڕیار دانی چارەنووس بڕیار و ئومێدی زۆربەی زۆری کوردستانیانە ، ئەو هێزە شاراوەیە بووە کە بە درێژایی مێژوو – بە تایبەتیش لەم سەد ساڵەی دوایی- خەڵکی کوردستانی هانداوە بۆ قوربانی دان ، ئەم قوربانی دانە لە پێناو دروشمی ئۆتۆنۆمی و ئۆتۆنۆمی راستەقینە و لامەرکەزی نەبووە ، سەربەخۆیی هێزە پاڵنەر و شاراوەکەی خەڵک بووە بۆ قوربانی دان .
مێژوو ، هەروا روداوەکانی ئەم چەند ساڵەی دوایی و رێچکەی چەند هەرێمێکی هاوشێوەی کوردستان بەرەو سەربەخۆیی پێمان دەڵێت کە بڕیاردان لە مافی چارەنووس دیاری نیە لە لایەن ووڵاتە زلهێزەکانەوە پێشکەش بە نەتەوە بێ دەوڵەتەکان بکرێت ، بەڵکو ئیرادە و وویستی میللەتانە خۆی فەرز دەکات و بە لێزانی سەرکردەکانی دەبێتە ئەمری واقیع . پێم سەیرە کاک رێبوار پێ ی وایە لەسەر ئاستی جەماوەری پێشوازی لە بیری سەربەخۆیی کوردستان نەکراوە ، لە کاتێکدا زیاتر لە سەدا ٩٥% خەڵکی کوردستان لە ساڵی ٢٠٠٥ دەنگیان بۆ سەربەخۆیی کوردستان دا لەو راپرسیەی کە بزوتنەوەی ریفراندۆم کردیان ، وە ئەو سەرۆکەی کە لە ئێستادا کار بۆ ئەم پرسە دەکات لە ٧٠% دەنگی خەڵکی کوردستانی بە دەست هێناوە . بۆیە ناکرێ هەروا بە سەرپێی بڵێت پشتیوانی جەماوەری بۆ ئەم پرسە نیە ، بۆ سەلماندنی ئەم بابەتەش نمونەیەکی تر دێنێتەوە و دەڵێت دەبوایە ئەو حیزبانەی کە ئەم دروشمەیان بەرزکردۆتەوە زۆرترین دەنگی ئەو ووڵاتەیان بەدەست هێنابوا بەڵام وا نەبوو!
کاک رێبوار هەرچەند خۆی لە ناوهێنان دەپارێزێت بەڵام دەزانێت کە تەنها حیزبێک و سەرۆکێک راشکاوانە لەبەردەم هەموو دونیا ئەم پرسەیان وروژاندووە و هەڵگری ئەو پەیامەن ، ئەوانیش سەرۆک بارزانی و پارتین ، وە هۆکاری نەبوونی پارتیش - کە هەڵگری ئەم دروشمەیە - بە هێزی بێ رکابەری کوردستان لەبەر کەمبایەخی بیری سەربەخۆیی نیە لەلایەن خەڵکی کوردستانەوە - وەک دەویسترێت وێنا بکرێت - تا هاوڵاتیانی کوردستان دەنگی پێ نەدەن ، بەڵکو کۆمەڵێک هۆکار هەن کە وا دەکەن پارتی ئەو دەنگە نەهێنێت ، کە بەشێکیان پەیوەستە بە نیگەرانی هاوڵاتیان لە پرۆسەی حوکمداری لە ناوخۆی کوردستان  و بەشێکیشی پەیوەستە بە ئیرادە و نفوزی نەرمی هێزە ئیقلیمی و نێودەوڵەتیەکان کە لە بەرژەوەندیان نیە لە کوردستان حیزبێک ژمارە یەکی بێ رکابەر بێت ، بەڵام سەرەڕای ئەوانەش بە حیکمەت و لێزانین و ئیدارەدانی سەرۆک بارزانی ، ئەوا پارتی حیزبی ملیۆن دەنگ دەری کوردستانە .
  سیاسیەکانی کوردستان وا نەشارەزا نین بە هەڵە لە مەسەلەی کۆنفیدرالی گەیشتبن وەک کاک ڕێبوار پێ ی وایە ، سیاسیەکانی کوردستان دەزانن قۆناغی دوای فیدرالی مافی چارەنووس و سەربەخۆییە ، بەڵام پێش ئەوەی باسی کۆنفیدراڵی کرا بێت باس لە گەڕانەوە بۆ رای خەڵکی کوردستان کراوە بۆ راپرسی و دیاریکردنی شێوەی پەیوەندی بە عیراقەوە ، ئەگەر خەڵکی کوردستان پێیان وابوو بەشێکن لە عیراقی ئێستا و بەم شێوە حوکمە رازین قسەیەک نیە ئیزافەی بکەین ، ئەگەر دەنگیشیان بۆ سەربەخۆیی بوو ، ئەوا دوای ئەو کاتە خەیاری کۆنفیدرالی دەبێتە یەکێک لەو شێوە پەیوەندیانەی کە ئەگەر کوردستان بیەوێت بە عیراقەوە بەستراوە بێت .
ئەگەر مافی چارەنووس لە دیباجەی دەستووری عیراق یان وەک بڕگەیەکی دەستوور نووسرا بێت یان نا ، هەرگیز ڕێگر نیە لە بەردەم وویستی خەڵکی کوردستان لە بڕیار دان لەسەر چارەنووسی خۆی ، کام بڕگە و کام رستە لە دەستووری عیراق جێ بە جێ کراوە تا خەڵکی کوردستان مولزەم بێت بەو دەستوورە و ریزی بگرێت و حیساب بۆ لانەدان لێ ی بکات ؟ خۆ ئەگەر وەک کاک رێبواریش دەڵێت لەسەر وویستی زۆرینەی عەرەبی عیراق راوەستین ، ئەوا گومانم نیە ئەگەر دەستیان بێت بەڕێوەبەری فەرمانگەکانیشمان عەرەب دادەنێن نەوەک مافی چارەنوسمان پێ رەوا ببینن.
ئەگەر کەسایەتیەک هەبێت بیەوێت و کار بکات کوردستان بەرەو سەربەخۆیی بچێت ئەوا سەرۆک بارزانیە ، سەرۆک بارزانیش ئەگەر کاک رێبوار پێ ی وایە نەیتوانیوە وەک یەک مامڵە لەگەڵ هەموواندا بکات ، ئەوا من پێم وایە کردوویەتی و وەک سەرۆک و رێبەرێکی بە ئەزموون لە هەموو پرسە چارەنووسسازەکان چەتری کۆکردنەوە و کۆدەنگی و یەکڕیزی ناوماڵی کوردستان بووە . پێم وایە بێ ئینسافیەکی گەورەیە ئەگەر هەوڵەکانی جەنابی سەرۆک بۆ یەکڕیزی ناوماڵی کوردستان نا دیدە بگیرێت . خۆ ئەگەر هێزێکیش هەبێت لەبەرهۆکاری تر پێ ی باش بێت ئەو یەکڕیزیە نەبێت ، حەق نیە گلەیی لە جەنابی سەرۆک بکرێت .
کەمکردنەوە لە بایەخی پشتیوانی چەند ووڵاتێکی خاوەن پێگە لەناو بڕیاری عەرەبی و ئەوروپا بۆ دروست بوونی دەوڵەت لە کوردستان ، سەرچیغ چوونی چاودێرانە لە سیاسەت و ناکرێت لە گرنگی و بایەخی ئەم پشتیوانیە کەم بکرێتەوە کە بەرهەمی دیپلۆماسیەت و سیاسەتی حەکیمانەی سەرۆک بارزانی و ئاڵ و گۆڕی بەرژەوەندیەکانە و لە خۆراوە نەهاتووە ، بەردەوامی جەنابی سەرۆکیش لەسەر ئەو سیاسەتە زۆر دەرگای داخراوی تر دەکاتەوە .
 چاودێران دەبێ بزانن ئەوا ئیرادەی سەربەخۆیە ووڵاتی سەربەخۆ دروست دەکات ، ئەو ئیرادەیەش لە کوردستان ئیرادەی سەرۆک بارزانیە .

#Kurdistan
#Barzani
#MasoudBarzani
#Rudaw
#SasanAwni
#SasanAwny


Popular posts from this blog

لە پشت سەنگەری پێشمەرگە.. ئافرەتان، سەنگەری دڵنیایین

پارتی لە چوارچێوەی پرۆسەی چاكسازیی ناو حزبدا، لە ناو رێكخراوە جەماوەرییەكاندا گۆڕانكاری و چاكسازی لە پەیكەری رێكخراوەیی، بەرنامە، دیدگە، جۆریەتی كاركردن، دارایی و خۆبەڕێوەبردنی دەكات

دۆنالد ترەمپ وئاستەنگەکانی سیاسیەتی دەرەوە