ئافرەت..ئاشتی و ئاسایشی كۆمەلگە بەرەو پێش دەبات

ئافرەت..ئاشتی و ئاسایشی كۆمەڵگە بەرەو پێش دەبات، تەوەری گۆڤاری (گوڵان)ە لە ژمارە(١٠١٢) لە ٢ی شوباتی ٢٠١٥ سەبارەت رۆلی ئافرەت لە بەرقەراركردنی ئاشتی و ئاسایشی كۆمەڵگە و وڵات و پرسیاریان سەبارەت ئەوەی ئایا پێمان وایە ئافرەت لەم دوو لایەنە رۆڵی كارای هەبێت؟

وەڵام دانەوەی ئەم پرسیارە لەو بڕوایەوە دەست پێ دەکات کە تێگەیشتنە لە رۆڵی ئافرەت لە ناو کۆمەڵگادا، تێگەیشتنە لە مەودا و ئەو پانتاییەی کە ئافرەت دەتوانێت رۆڵی تێدا بگێڕێت و زانینی هاندەر و پاڵنەرەکانی ئەم رۆڵبینینەیە و لە هەمان کاتیش دەست نیشانکردنی بەربەست و لەمپەرەکانی بەردەمێتی.

بابەتی بەشداری ئافرەتان لە کایەکانی ناو کۆمەڵگا و بە تایبەتیش لە بەرقەرارکردنی ئاسایش و ئاشتی کۆمەڵایەتی، پرسێک نیە تەنها پەیوەست بێت بە کوردستان و بە کۆمەڵگاکەی ئێمە، بەڵکو پرسێکی جیهانیە و هەموو ووڵاتانی جیهان، بە تایبەتیش ووڵاتە پێشکەوتووەکان و دامەزراوە نێو نەتەوەییەکان و رێکخراوی نەتەوە یەکگرتووەکان، بەبایەخەوە لەم پرسە دەڕوانن و کاری لەسەر دەکەن، بە تایبەتیش لەم بیست ساڵەی دواییدا زۆرترین کاری لەسەر کراوە ، بڕیارێکی نەتەوە یەکگرتوەکان لە ڕێی ئەنجومەنی ئاسایشەوە تایبەتکراوە بەوەی کە(ئافرەت رەگەزێکی کاریگەری ئاسایش و ئاشتیە)، ئەم بڕیارە بە بڕیاری ١٣٢٥ی ساڵی ٢٠٠٠ ناسراوە کە هەوڵێکە بۆ بەشداری پێکردنی زیاتری ئافرەتان وەک رەگەزێکی زۆر کاریگەر و یەکلاکەرەوە لە بەرقەرار کردن و دروستکردنی ئاشتی دا.

کە باسیش لە دروستکردنی ئاشتی، یاخود چەمکی ئاشتی دەکەین تەنها مەبەستمان لێ ی نەمانی جەنگ و شەڕ و ئاژاوە نیە، بەڵکو مەبەستمان دیوەکانی تریشە لە چەمکی ئاشتی، کە ئەویش خۆی لە "پێکەوە ژیانی ئاشتیانەی پێکهاتە نەتەوەیی و ئایینیەکان و ئەندامانی کۆمەڵگا لەگەڵ یەک، دادپەروەری، ریزگرتن لە مافەکانی مرۆڤ، ئاسایش، پارێزگاری لە ژینگە، ناتوندو تیژی، سەقامگیری، لێبوردەیی، هاوکاری، دیموکراتیەت، ئازادی بیرورا و دەڕبڕین و بەشداری سیاسی، نەکردنی جیاوازی و دەرفەتی یەکسان" دەبینێتەوە، کە هەریەکەی بەشیوەیەک و بەیەکەوە تەعبیر لە چەمکی ئاشتی دەکەن.

بۆیە تێگەیشتن لە چەمکی (ئاشتی)دەروازە گرنگەکەی بەرقەرارکردنی ئاشتی کۆمەڵایەتیە کە ئافرەت دەتوانێت رۆڵێکی پێشەنگ و باڵا لە بەرقەرارکردنی ئاشتی کۆمەڵایەتی دا بگێڕێت، ئەویش لە ڕێی پەروەردە و پێگەیاندن و تەنشئەی کۆمەڵایەتیەوە، کە (خێزان) ژینگەی سەرەتایی و کاریگەری ئەم پێگەیاندنەیە، زانراویشە کە رۆڵی ئافرەت وەکو (دایک) چەند کاریگەر و پڕ بایەخ و گرنگە لە ناو خێزان لە پەروەردەکردن و ئاراستەکردنی منداڵ و پێدانی خۆشەویستی و چاندنی ئەو بەها و پرەنسیپانەی کە رێچکەی ژیانی داهاتووی منداڵ دیاری دەکەن و لەو کارلێکەی کە پێیی دەگوترێت تەنشئەی کۆمەڵایەتی.

کوردستان وەک کۆمەڵگایەک کە لە قۆناغێکی هەستیاری راگوزەر دایە، ئافرەتانی کە نیوەی کۆمەڵن، دەبێت بە پێ ی ژمارە و قەبارەیان لە ناو کۆمەڵگادا رۆڵیان هەبیت لە چارەسەری تەنگژەکانی ناو کۆمەڵگا و لە پێشکەوتنەکانیدا. ئافرەتی کوردستان رۆڵی هەیە لە بەرقەراکردنی ئاشتی و ئاسایشی کۆمەڵایەتیدا، بە رۆڵبینیان لە پەروەردەکردنی منداڵان بە بەهاکانی مرۆڤدۆستی، ناتوندوتیژی، خۆشەویستی، لێبوردەیی، جیاوازی نەکردن و قبوڵکردنی یەکتری، پێکەوەژیان، خو و رەوشت و ئاکاری بەرز و بەها و داب و نەریتە راستەکان. نابێ ئەوەش نادیدە بگیرێت کە ئێستا لە بارودۆخی جەنگ داین، نیوەی گرانایی جەنگ لە سەر شانی ئافرەتە، هەر لە پەروەردەکردنی منداڵ، سەرپەرشتی ماڵ و خێزان، کارکردن و پەیداکردنی بژێو، هاندانی پیاو لە رەوایی جەنگ و خۆڕاگریی، هەروەها بەرگەگرتنی شەهید بوونی باوک و برا و مێرد و بەردەوام بوون لە جۆرێکی تری ژیان.

جێی باسە رۆڵبینی ئافرەت لە بەرقەرارکردنی ئاشتی کۆمەڵایەتیدا نایەتە دی ئەگەر کەشی کۆمەڵایەتی و تێگەیشتن و روانین بۆ رۆڵی ئافرەت لە ئاستی پێویست نەبێت، هەر لە تەماشاکردن و رەفتاری یەکسان لە ناو خێزان، دەستەبەرکردنی فرسەتی خوێندن و فێربوون و خویندنی باڵا، دەرفەتی کار و پەیداکردنی داهات و توانای خۆبەڕێوەبردن و بەشداری لە ئابووری خیزان، هاوبەشی و بەشداری لە بواری سیاسی و ئابوری وکەلتوریدا، هەروەها بوون و پیادەکردنی ئەو یاسا و رێسایانەی کە مافی ئافرەت دەپارێزن. 

لێرەدا ئەرکی نیوەکەی تری کۆمەڵ، بە تایبەتیش ئەو بژاردەیەی کە بڕوای تەواوی بە یەکسانی هەیە، دەست پێدەکات، لە نەهێشتنی ئەو بەربەستانەی کە دێنە پێش رۆڵبینینی ئافرەت، بە هەوڵدان بۆ دەرباز بوون لە هەندێ کەشی کۆمەڵایەتی نادروست و ئەو روانینە نازانستیەی کە گومان لە توانا و هەڵسوکەوتی ئافرەت دەکات ، ئەویش بە بڕوابوون بە کۆمەڵگایەکی پڕ یەکسانی و بێ جیاوازی، بەهای هاوبەش، کارکردنی بەیەکەوە، هەڵگرتنی بەرپرسیاریتی هاوبەش و بڕوا و متمانە.

Popular posts from this blog

لە پشت سەنگەری پێشمەرگە.. ئافرەتان، سەنگەری دڵنیایین

پارتی لە چوارچێوەی پرۆسەی چاكسازیی ناو حزبدا، لە ناو رێكخراوە جەماوەرییەكاندا گۆڕانكاری و چاكسازی لە پەیكەری رێكخراوەیی، بەرنامە، دیدگە، جۆریەتی كاركردن، دارایی و خۆبەڕێوەبردنی دەكات

دۆنالد ترەمپ وئاستەنگەکانی سیاسیەتی دەرەوە