سەرکەوتنی شەنگال، ئاڵقەیەکی تری سەرکەوتنی مرۆڤایەتی


ئازادکردنی شەنگال و سەرکەوتنی گەورەی پێشمەرگەی کوردستان بەسەرپەرشتی راستەوخۆی سەرۆک بارزانی، تەنها سەرکەوتنێکی ئاسایی بەرەیەکی شەڕ نیە لەو بەرە دوور و درێژەی جەنگ کە کوردستان لەگەڵ تیرۆر هەیەتی، تەنها گێڕانەوەی شارێکی داگیرکراو نیە بۆ ژێر ئاڵای کوردستان. ئەم سەرکەوتنە کە لە ماوەیەکی کورتخایەن و بە پێی پلانێکی سەرکەوتوو لە سەر دەستی پێشمەرگە و بە هاوکاری هێزی هەوایی هاوپەیمانان تۆمارکرا، رەهەندی درێژخایەن و لێکەوتەی جیای لەسەر ئاستی ناوخۆیی و دەرەوە لێدەکەوێتەوە. 
سەرکەوتنەکە هێما و رەمزیەتی لەوە بەرجەستە دەبێت کە شەنگال جگە لەوەی ناوچەیەکی ستراتیجی ناو نەخشەی هەرێمی کوردستانە و مەڵبەندی ئێزدیخانە و سیمبولێکی پێکەوەژیانی ئایینی و نەتەوەییە، لە هەمان کاتیش سەرکەوتنەوەی جارێکی تری ئیرادەی کوردستانە لە دوای ئەنفالێکی تر. ئەگەر راپەرینی ١٩٩١ سارێژی زامەکانی ئەنفالی یەکەمی کردبێت، ئەوا بە دڵنیاییەوە ئەم سەرکەوتنە مەزنە سارێژی برینی ئەو ئەنفال و کۆمەڵکوژیە نوێیە دەکات کە لە ٢٠١٤دا ئەنجام درا. جوگرافیایەکی فراوان ئازادکرایەوە، خەڵکە ئاوارەکەی ئەگەر لە ئێساتشدا نەتوانن بگەڕێنەوە زێدی خۆیان، بەڵام دڵنیا و ئاسوودەن کە شوێنەکانیان لە ژێر پاراستنی پێشمەرگە و خۆیان دایە، دوژمنی لەسەر نەماوە و لە ئاییندەیەکی نزیکدا دەتوانن بگەڕێنەوە و ماڵ و شوێنی ژیان و پەرەستگاکانیان نۆژەن بکەنەوە. 
ئازادکردنەوەی شەنگال کاریگەری لەسەر داهاتووی جەنگی دژە داعش دەبێت، گرنگە سوود لە هەژموونەکەی وەربگیرێت، بە تایبەتیش کە ئەم ئۆپەراسیۆنە باکوری دەوڵەتەکەی داعشی کەرت کرد و رێگای پەیوەندی نێوان پایتەختەکەیان لە رەققە و گەورەترین شاری بەردەستیان لە عیراق کە موسڵە بڕی. بۆیە بەغدا ئەگەر بیەوێت دەتوانێت سوود لەم دەرفەتە وەربگرێت و هێزەکانی رووەو موسڵ ئاراستە بکات، سوود لە روخانی هێز و نەمانی وورەی داعش وەرگرێت کە بەدەستی پێشمەرگە هاتۆتە دی، نەوەک بە پێچەوانەوە حەشدی شەعبی لە دووزخورماتوو بکەونە وێزەی خەڵکی کورد و بەرەیەکی تری گرژی لەگەڵ خەڵکی کوردستان بکەنەوە. 
سەرکەوتنی شەنگال دەکرێت بە ئاڵقەیەکی تری سەرکەوتنی مرۆڤایەتیش دابنرێت لە دژی داعش، راستە ئەم سەرکەوتنە بە سەرپەرشتی سەرۆکی کوردستان و بە جێبەجێکردن و خوێنی گەشی پێشمەرگە نەخشێنرا، بەڵام سەرکەوتنێک نیە تەنها بۆ کوردستان بەڵکو جێی ستایشی هەموو مرۆڤایەتیە و بە سەرکەوتنی خۆیانی دەزانن، رەهەندەکانی ئەم سەرکەوتنە و دەنگ دانەوەکانی زۆر دوورتر لە کوردستان بەدیار دەکەون و دەنگ دەدەنەوە و بە دەستپێکی کۆتایی هاتنی دەوڵەتی داعش لێکدانەوەی بۆ دەکرێت. 
دوای هێرشە تیرۆریستیەکەی پاریسی پایتەختی فەرەنسا و لێکەوتنەوەی ئەم ژمارە زۆرەی قوربانیەش، رووداوەکان وا دەخوازێت کە کۆمەڵگای نێودەوڵەتی بگاتە ئەو بڕوایەی کە پێویستە هەم ستراتیژ، هەم ووردەکاری شەڕ لەگەڵ ئەم رێکخراوە گۆڕانکاری بەسەر دابێت، شەڕ لە بەر دەرگای مرۆڤایەتیە و کەس نابوێرێت، بۆیە ئەرکی کۆمەڵگای نێو دەوڵەتیشە کە هاوپەیمانی نێو دەوڵەتی دژە داعش فراوان تر و ئەکتیڤ تر بکرێت و ئەگەر پێویست بوو بڕیاری تازە لە ئەنجوومەنی ئاسایش دەربچێت، هاوکاری زیاتری پێشمەرگە بکرێت، گروپە میانڕۆ و دژە داعشەکانی کە بڕوایان بە دیموکرسی هەیە پڕ چەک بکرێن، ئەم جەنگە دەبێت لەسەر زەوی، لە نێو مۆڵگەی داعش یەکلابکریتەوە و داعش بشکێنرێت، تەنانەت ئەگەر پێویستیشی بە هێنانی سوپای نێودەوڵەتیش بێت.

لە رۆژنامەی هەولێر ژمارە ٢٢٥٥ی رۆژی ١٦ی تشرینی دووەمی ٢٠١٥ بڵاوکراوەتەوە

Popular posts from this blog

لە پشت سەنگەری پێشمەرگە.. ئافرەتان، سەنگەری دڵنیایین

پارتی لە چوارچێوەی پرۆسەی چاكسازیی ناو حزبدا، لە ناو رێكخراوە جەماوەرییەكاندا گۆڕانكاری و چاكسازی لە پەیكەری رێكخراوەیی، بەرنامە، دیدگە، جۆریەتی كاركردن، دارایی و خۆبەڕێوەبردنی دەكات

دۆنالد ترەمپ وئاستەنگەکانی سیاسیەتی دەرەوە