"ریفراندۆم وەک هەنگاوی بەرایی سەربەخۆیی"



ئامادەبوانی بەڕێز

ئەم کاتەتان باش ..

بە ناوی دەستەی رێکخراوە جەماوەری و پیشەییەکانی پارتی دیموکراتی کوردستان، بە خێر هاتنێکی گەرمی هەموو لایەکتان دەکەین بۆ ئەم دیدارە، کە بە سوپاسەوە مەکتەبی سکرتاریەتی یەکیتی لاوانی دیموکراتی کوردستان لە پاڵ چالاکیە دیارو بەرچاوەکانی تریان، لە یادی ٦٣ سالەی دامەزرانی رێکخراوەکەیان رێکیان خستووە، کە دەرفەتە پیرۆزبایی گەرم لە هەموو قوتابیان و لاوانی کوردستان بکەین.

بەڕێزان..

(ریفراندۆم وەک هەنگاوی بەرایی سەربەخۆیی) ئەو ناونیشانەیە کە یەکێتی لاوانی دیموکراتی کوردستان، وەک هەوڵێک لەم بزاوتە سیاسی و جەماوەریەی لە کوردستان سەری هەڵداوە و چەندین جار لە لایەن جەنابی سەرۆک (مەسعود بارزانی)ەوە وروژێنراوە، بەشداری دەکات و قەڵەمی کۆمەڵێک سیاستمەداری بەڕێز، لە بیروبۆچوون و لایەنی جیاواز، کە شایانی سوپاس و ریزن، بەشداریانن لە سەرخستنی ئەم هەوڵەیان، کە بە بڕوای ئێمە ئەم بزاوتە سیاسی و جەماوەریە (وەک چۆن پێویستی بە هاندان و پشتگیری و فراوانکردنی بەشداری میللیە) وەهاش پێویستی بە لێکۆڵینەوە و شرۆڤەی بەردەوام و خستنە رووی هەموو بیروبۆچون و روانینەکان هەیە لە هەموو گۆشە نیگاکانەوە، چ ئەوانەی سەرسەختانە پشتگیری لەم بزاوتە دەکەن و پێمان وایە کاتێتی، یان ئەوانەی راڕان و لەبەر هەر هۆیەک پێیان وایە لە ئێستادا دەرفەت لەبار نیە و ئەولەویاتی تریان لە پێشە.

کرانەوە بەسەر هەموو بیروبۆچونەکان و وەرگرتنیان بە دڵسۆزی و خەمخۆریەوە، ئاسۆ و مەودای بینین و کارکردن رۆشنتر و روونتر دەکات و ئەو هێزەمان پێ دەبەخشێت کە بە بڕوابوونێکی زیاترەوە هەنگاوەکانمان هەڵێنین، کە بێگومانین هەموو بیر و بۆچونەکان لە خزمەتی دۆزەکە و ئاییندەی ووڵاتەکەمان دایە.

بەڕێزان ..

لەم رۆژهەڵاتە ناوەراستە گڕگرتوەی کە بۆتە مەیدانی یەکلاکردنەوەی حساباتی زلهێزەکانی دونیا و پێکدادانی هێز و هەژموونی یاریکەرە ئیقلیمیەکان ... لەم رۆژهەڵاتی ناوەڕاستەی کە دوای ١٠٠ ساڵ لە دابەشکردنی دوور لە وویستی نەتەوە و میللەتانی ناوچەکەی، جارێکی تر ململانێیە لەسەر هێشتنەوەی ناوچەکە لە چوارچێوەکانی ئێستایدا، یان دووبارە دروستکردنەوە و داڕشتنەوەی، ئەم ململانێیە ناوچەکەی کردۆتە گۆمی خوێن و هەزارەها خەڵکی سڤیل و بێ دەرەتان بوونەتە قوربانی و ملیۆنانیش بونەتە ئاوارە و پەناهەندەی ووڵاتان، کە ئێمەی کوردستانیی لە نێو جەرگەی ئەم جەنگە خوێناویە داین و تا ئێستا نزیکەی ١٥٠٠ لاومان گیانی خۆی بەخت کردووە لە پێناوی مرۆڤایەتی و ئازادی و ژیانێکی سەربەرزدا.

بوونمان وەکو کوردستانیی لەناو جەرگەی ئەم ململانێیەدا، کە لە هەوڵی پاراستنی بوون و ناسنامە و شوناس و شێوە ژیانی پێکەوەیی و بەرەو پێشبردنی تاقیکردنەوەکەمانین، مافی چارەنووس ئەو پاڵنەر و هێزە شاراوەیە بووە کە بە درێژایی مێژوو، بە تایبەتیش لەم سەد ساڵەی دواییدا خەڵکی کوردستانی پاڵناوە بۆ قوربانیدان و بەرگری، ئێمەی خستۆتە بەردەم هەردوو رەگەزی ( دەرفەت و کات).

مێژوو و تاقیکردنەوەکانی پێمان دەڵێت، رەوتی رووداوەکان چاوەڕێی کەس ناکەن، مافی میللەتان نابەخشرێت بەڵکو بەدەست دەهێنرێت، دەرفەتە مێژوویەکان هەموو ساڵێک دووبارە نابنەوە و گۆڕانکاری گەورەی دەوێت لە ساتە وەختە مێژوییەکاندا، بۆیە ئێستا دوای ١٠٠ ساڵ جارێکی تر ئێمەی کوردستانی لەبەردەمی دەرفەتێکین لە کاتێکی دیاریکراودا، ئەم دەرفەتە لە هەموومان دەخوازێت کە کاتی زێڕینی کارکردنی بە پلان و ئامانجدارو بە یەکەوەیی ، لە ململانێی بێ سوود و تاقەت پڕوکێنی ناوخۆیی بەهەدەر نەدەین و هەموو هێز و تواناکان بە ئاراستەی کارکدنی میللی بن بەرەو راوەرگرتنی خەڵکی کوردستان و دیاریکردن و دەستنیشانکردنی چارەنووسمان.

بەڕێزان ..

بە دەرفەتی دەزانین لەم کۆنفرانسەدا، کە وەک هەوڵ و هەنگاوێکە لە رێگا دوور و درێژەکەی مافی چارەنووس، تەئکید لەوە بکەینەوە کە لە چوارچێوی کارکردنمان لە پارتی دیموکراتی کوردستاندا لە ئاراستە کردنی رێکخراو و جەماوەری قوتابیان و لاوان و ئافرەتاندا، هەردەم جەخت لە پرنسیپەکانی میانڕەوی و دووربوون لە دەمارگیری نەتەوەیی و ئایینی و مومارەسەکردنی مافە دیموکراتیەکان دەکەینەوە، جەخت لە پرسی پێکەوەژیانی ئاشتیانە و ریزگرتن لە نەوتەوە وئایین و بیروڕا و بەها جیاوازەکان دەکەینەوە، کە سەرەڕای هەموو گرفتەکانمان، کوردستانی کردۆتە پەناگەیێکی ئارامی هەموو لێقەوماوانی تووندڕەوی ئایینی و تایفی و نەتەوەیی لە عیراقدا.

بۆیە لەو کاتانەش کە لە هەوڵی هەنگاو نانین بەرەو ریفراندۆم، لە هەموو کات زیاتر پێویستیمان بە دڵنیاکردنەوەی هەموو پێکهاتەکان هەیە لە ئاییندەیان و ئەم پرسە پرس و دیاریکردنی چارەنووسی هەموومانە پێكەوە بۆیە کارکردنی هەمووانی بەیەکەوە دەوێت، بێگومان لەگەڵ یەکگرتوویی و یەکڕیزی لایەنە سیاسیەکان و بە لاوەنانی کێشەکانمان و زاڵکردنی بەرژەوەندی نیشتمانی و بوونی گووتارێکی هاوبەشی کوردستانیانەی یەکگرتوو، زامنن بۆ گەیشتن بە چارەنووس و مافە رەواکانمان.

بە هیوای یەکڕیزی و کارکردنی بە یەکەوەیی و لە دەستنەدانی دەرفەت و کات

سوپاس بۆ یەکێتی لاوانی دیموکراتی کوردستان

دروود و سڵاو بۆ گیانی پاکی شەهیدانی بەرگری لە کوردستان و سەروەری شەهیدان بارزانی نەمر و کاک ئیدریسی هەمیشە لە یاد.

Popular posts from this blog

لە پشت سەنگەری پێشمەرگە.. ئافرەتان، سەنگەری دڵنیایین

پارتی لە چوارچێوەی پرۆسەی چاكسازیی ناو حزبدا، لە ناو رێكخراوە جەماوەرییەكاندا گۆڕانكاری و چاكسازی لە پەیكەری رێكخراوەیی، بەرنامە، دیدگە، جۆریەتی كاركردن، دارایی و خۆبەڕێوەبردنی دەكات

دۆنالد ترەمپ وئاستەنگەکانی سیاسیەتی دەرەوە