٢٥ ساڵ دوای راپەرین ..

دوای بیست و پێنج ساڵ لە راپەرین، تا ئێستاش بەشێکی زۆری روانین و خوێندنەوەمان بۆ ئەم وەرچەرخانە گرنگە، بۆ ئەم گۆڕانە ریشەییە، لە گۆشەی پیاهەڵدانێکی سادەی حەماسی میدیایی و گوتنەوەی هەندێک دروشمی دووبارە و سوڕانەوە لە بازنەی دەستکەوتی حیزبی رەتی نەداوە.
وەرچەرخانە گرنگەکانی ژیانی میللەتان، مەگەر میللەتێکی بێ باک نەبێت، ئەگەر نا درشت و ووردی لایەنەکانی، هەموو لێکەوتە و هۆکارەکانی، ووردەکاری روداوەکانی، کارەکتەرەکانی، بەرەنجام و کاریگەریەکانی، دەخرێنە بەر باس و لێکۆڵینەوە، بە جۆرەها شێوە و شێوازی زانستی تەوزیف دەکرێنەوە ناوهەموو بوارەکانی ژیان و بە تایبەتیش بۆ دروستکردنی کاریگەری لەسەر نەوەی تازە و داهاتوو، ئەو نەوانەی کە لە سەردەمی رووداوەکان نەژیاون و تەنها بە گێڕانەوەیەکی سادەی میدیایی لە یەک رۆژ یان چەند رۆژێکدا ناتوانن وێنای سەردەمێک لە مێشکیاندا بکرێت کە بە چاوی خۆیان نەیانبینیوە.
ئەو نەوەیەی کە لە دوای ساڵی ١٩٩١ لە دایک بووە، بەشێکی کەمی نەبێت، زۆرینەیان لە جۆری ژیانی پێش ساڵی ١٩٩١ ناگەن و لە خەیاڵیشیاندا ناتوانن وێنەی بکێشن. لە ئازارەکانی ترس و تۆقان ناگەن، ئەستەمە لەوە بگەن رژێمێک هەبووە لەسەر پارچە شیعرێک، کاسێتێک ، کتێبێک گەنجی هاوتەمەنی ئەوانی لە سێدارە داوە. ئەم نەوەیە نازانێت بەعس چ بوو، نازانێ تەبەعیەت بۆ بەغدا و ژێر دەستەیی مانای چیە، بۆیە لە ژێر کاریگەری میدیای ئێستا، لای ئاساییە کە بەغدا و گەڕانەوە بۆ بەغدای لا گرنگتر بێت لە هەولێر.
پرسیارە سەختەکە لێرەدایە، ئایا کەمتەرخەمی ئەو نەوەیەیە کە نەهامەتیەکانی ساڵانی رابردوو و سەروەریەکانی میللەتەکەی بەباشی نازانێت، یان کەموکوڕی لە ئێمەیە و ناکرێت چیتر بە پاساوی بێ بنەما لە دوای ٢٥ ساڵ لە بەرپرسیارێتیەکانی راکەین؟
دوای ٢٥ ساڵ ناکرێت تەنها لە دیدی ئێمەوە، ئێمەی هاوساڵەکانی کە لە سەردەمی راپەرین ژیاوین لە راپەرین بنواڕین و تەنها بە گێڕانەوەیەکی سۆزداری نیمچە مێژوویی و هەر کەس لە روانگەی خۆیەوە ئەم رووداوە گەورەیە بگێڕێتەوە، کە هەندێ جار تەنانەت یەک خاڵی بچوکی هاوبەش لە نێو گێڕانەوەکان نین. ئەم نەوەیە نابێت گلەیی لێبکرێت کە کەمتەرخەم و بێباک بەرامبەر ئەم مێژووە دەوەستێت چونکە گێڕانەوەکان بە پێی گۆڕینی کەناڵەکان دەگۆڕێن!
روداوی وا گەورە ئەگەر بەپێی پلانێکی نیشتمانیی زانستی و لە دیدگا جۆراوجۆرەکانی زانستە مرۆڤایەتیەکانەوە نەبێتە بەشێکی ژیان و لە وانەکانی خوێندن و پێگەیاندنی زانستی و کۆمەڵایەتی و سیاسی و رۆشنبیری و میدیا رەنگنەداتەوە، هەرگیز ناتوانێت بە شێوە راستەقینەکەی (یادەوەری هاوبەش) لە نێوان تاکەکانی میللەت دروست بکات و هەروەک روداوێکی راگوزەر تەماشا دەکرێت، کە گرفتە مەزنەکە لێرە دایە.

لە رۆژنامەی هەولێر ژمارە ٢٣٣٢ رۆژی ٩ی ئاداری ٢٠١٦ بڵاوکراوەتەوە.

Popular posts from this blog

لە پشت سەنگەری پێشمەرگە.. ئافرەتان، سەنگەری دڵنیایین

پارتی لە چوارچێوەی پرۆسەی چاكسازیی ناو حزبدا، لە ناو رێكخراوە جەماوەرییەكاندا گۆڕانكاری و چاكسازی لە پەیكەری رێكخراوەیی، بەرنامە، دیدگە، جۆریەتی كاركردن، دارایی و خۆبەڕێوەبردنی دەكات

دۆنالد ترەمپ وئاستەنگەکانی سیاسیەتی دەرەوە