دیدێکی تر .. رۆژنامەگەری کوردی هۆکارێک بۆ پەرتکردن



* لەگەڵ هەموو ئەو دەستکەوتانەی کە بە هۆی دەرچوونی رۆژنامە و بزاڤی رۆژنامەگەری کوردی بەدەست هاتوون، بەلام وەکو هەموو بزاڤەکانی تر بەدەر نیە لە رەخنە و هەڵسەنگاندن، بەدەر نیە لەوەی کە لەگەڵ رەوتی گەشە و پێگەیشتنی خۆی لە ئەنجامی خراپ بەڕێوەبردنی، زۆر دیاردەی ناتەندروستیشی لەگەڵ خۆیدا هێناوە و بەردەوامی پێداوە.
* رۆژنامەگەری کوردی هاوتەمەنە لەگەڵ مێژووی هاوچەرخی سەد ساڵەی کوردستان، کە مێژووی ناسەقامگیری دوای دابەشکردن و چەکەرەکردنی بیری نەتەوەیی و بزووتنەوەکانێتی، مێژووی شۆڕشەکان و سەرکردەکانە، کە زیاتر مێژویێکی سیاسیە. بە هەمان شێوەش بەشێکی بریتیە لە مێژووی ناتەبایی و ململانێ و شەڕێ نێوخۆیی، کە رۆژنامەگەری رەگەزێکی کاریگەری ئەم مێژووەیە بە هەردوو دیوەکانیدا.
* لەبەر ئەوەی گەشەکردنی رۆژنامەگەری بەرهەمی بزووتنەوە سیاسیەکەیە، بۆیە قەیرانەکانی بزووتنەوە سیاسیەکە رەنگدانەوەی هەیە لە ناو بزاڤە رۆژنامەگەریەکە. ململانێکانی ناو هەناوی بزووتنەوە سیاسیەکە لە رێگای رۆژنامەگەریەوە بە دیارخراوە و رۆژنامەگەری ئەو ئامرازە بووە کە درێژەی بە ململانێکان داوە، لە کاتی کەرت بوون و پەرت بوون و لێک دوورکەوتنەوەکانیش هەر رۆژنامەگەری ئامرازی رەوایی دان بە پەرت بوون و کەرت بوون و قوڵکردنەوەی درزەکان بووە، کە تا ئێستاش درێژەی هەیە.
* رۆژنامەگەری بە باشی و خراپیەکانیەوە ئامرازە، کەموکوڕی لەو یاسایانە هەیە کە بزاڤی رۆژنامەگەری رێک دەخەن. یاساکان پێویستیان بە شێوەیەک لە رێکخستنەوە هەیە کە لەگەڵ ئازادی لە بڵاوکردنەوە و پەخش و ئازادی لە بیروڕا و ئازادی لە گەیشتن بە زانیاری، ئازادی دەزگا پەیوەند دارەکانیشی تێدا بێت سەبارەت بە زانین وئاشکرایی سەرچاوەکانی دارایی میدیاکان و دیاریکردنی ئەو بابەتانەی کە لەگەڵ بەرژەوەندی نیشتمانی و گشتی یەکناگرێتەوە. لەگەڵ ئەوەی کە چەمکی بەرژەوندی گشتی و نیشتمانی نەکرێتە چەمکێکی لاستیکی بە دەستی دەسەڵاتەوە بۆ سنووردارکردنی ئازادی لە بڵاوکردنەوە.
* دەرهاویشتەیێکی دیکەی بزاڤی رۆژنامگەری کوردی ئەو میدیایانەن کە بە خۆیان دەڵین میدیای بێلایەن، لە کاتێکدا پاشگری بێلایەن لە هیچ میدیایەکی دیکەی جیهان وجودی نیە، بە تایبەتی ئەو میدیایانەی کە روپۆشی هەواڵ و بابەتی سیاسی ناوخۆیی و دەرەکی دەکەن. میدیا نەوەک بەرامبەر سیاسەت ناتوانێ بێلایەن بێت، بەڵکو تەنانەت لە روانین بۆ سروشت و جیهانی گیانلەبەران و هونەر و بەرنامەی منداڵانیش ناتوانێت بێلایەن بێت، چونکە لە کۆتاییدا میدیا گەیێنەری پەیامی ئەو لایەن یان کەسەیە کە خاوەندارێتی دەکات و مەحکومە بە دونیا بینینی ئەو.
* میدیای ئەلیکترۆنی و کۆمەڵایەتی، دیاردەیەکی تازەی رۆژنامەگەریە لە جیهان و کوردستان، بەڵام بە جیاوازیەوە، لە ووڵاتانی جیهان لەگەڵ سەرهەڵدانی دیاردە تازەکان بە رێوشوێنی یاسایی و لە چوارچێوەی یاسای تایبەتدا کارەکانیان رێک دەخرێت، بەڵام لە کوردستان تا ئێستا ئەم بابەتە خەمی حکومەت و هیچ لایەنێک نیە. لە ووڵاتانی تر یاسای رێکخستنی بڵاوکردنەوە لە میدیای ئەلیکترۆنی هیچی کەمتر نیە لە یاساکانی کاروباری کەسیی و یاسا جینائیەکان، بوار نادرێت تەشهیر و ناوزڕاندنی بێ بەڵگە لە پەیجی ئەلیکترۆنی بێ دایک و باوک و میدیای سێبەر بکرێت و لە کاتی هەبوونی بابەتی لەم شێوەیە زوو ئاشکرا دەکرێت و کەسەکان راپێچی بەردەم دادگا دەکرێن، بەڵام بە داخەوە تا ئێستا لە کوردستان ئەم بابەتە راوەستانی جدیی و خەمخۆرانەی لە ئاست نەکراوە و بۆتە بازرگانیەک کە داهاتی هەیە.


لە ژمارە ١ی بلاوکراوەی (کۆمەڵگای مەدەنی)ی دەستەی رێکخراوە جەماوەری و پیشەییەکانی پارتی دیموکراتی کوردستان بە بۆنەی ١١٨ ساڵەی رۆژنامەگەری کوردی لە ٢٢ی نیسانی ٢٠١٦ بلاوکراوەتەوە.

Popular posts from this blog

لە پشت سەنگەری پێشمەرگە.. ئافرەتان، سەنگەری دڵنیایین

پارتی لە چوارچێوەی پرۆسەی چاكسازیی ناو حزبدا، لە ناو رێكخراوە جەماوەرییەكاندا گۆڕانكاری و چاكسازی لە پەیكەری رێكخراوەیی، بەرنامە، دیدگە، جۆریەتی كاركردن، دارایی و خۆبەڕێوەبردنی دەكات

دۆنالد ترەمپ وئاستەنگەکانی سیاسیەتی دەرەوە