"دەستی تر رۆڵی لە قوڵکردنەوەی ناکۆکیەکاندا هەیە" چاوپێکەوتن لەگەڵ رۆژنامەی وشە



” دەستی تر رۆڵى لە قوڵکردنی ناکۆکیەکاندا هەیە و هەوڵ دەدرێت بە درێژەدان بە ناکۆکیەکان، هەستی بێزاری و ناڕەزایی لای خەڵک زیاد بکرێت و ئاراستەی خەڵک لە پشتگیری ستراتیژ و پرۆژەی سەربەخۆیی و دروستکردنی دەوڵەت بگوازرێتەوە سەر خەریککردن بە گرفت و ناکۆکی ناوخۆیی و سەرەنجام بڵاوکردنەوەی نا ئومێدی و بڕوا بە خۆنەمان"
وشە/ هەولێر

ساسان عەونی بەرپرسی دەستەی رێکخراوە جەماوەری و پیشەییەکانی پارتی دیموکراتی کوردستان رای دەگەیەنێت، گۆڕانکاریەکانی ناو پارتی بەردەوام دەبن لە جەند ناوجەیەک و دووپاتی دەکاتەوە، جەماوەری حزبەکەیپەسندی گۆڕانکاریەکانیان کردووە. هاوکات رەخنە لە حزبەکان دەگرێ بەوەی وەک پێویست توانای بڕیاردانیان نییە بۆ تێپەراندنی ئەم دۆخەی کوردستان و دەڵێ "ئەوەی لەسەر پارتی بووە کردوویەتی و یەکێتیش هیچ بەشی لە لای پارتی نەماوە"

عەونی کە لە دوا گۆڕانکارییەکانی ناو پارتیدا پۆستەکەی لە جێگرەوە بۆ بەرپرسی مەکتەب بەرزکرایەوە، رای دەگەیەنێ کە ئەوەی پەکەکە دەیکات، بۆ خزمەتی بەرنامەی دەرەکییە و داوا لەو حزبە دەکات "جارێکی تر خۆی تاقی نەکاتەوە، چونکە پێشتر خۆی تاقی کردووەتەوە".

 گۆڕانكارییه‌كانی پارتی له‌ناو كادران زیاتر وه‌ك شوێنگۆڕكێ باسی لێ ده‌كرێ، پێتان وایه‌ جه‌ماوه‌ری خۆتان رازی كردووه‌ به‌و گۆڕانكارییانه‌؟
گۆرانکاری لەناو پارتی پرۆسەیێکی دیراسەکراو و بەبەرنامەیە، وەڵام دانەوەی پێویستیەکانی قۆناغەکەیە و کاردانەوەیێکی کاتی نیە، داودەزگە و ئۆرگانە حیزبیەکان بەشدار دەبن لە گەڵاڵەکردنی شێوە و جۆر و چۆنایەتی گۆڕانکاریەکان. لەبارەی گۆڕانکاریانەی ئەم دواییەش، سەرۆک بارزانی لە کۆبوونەوەی ئەنجومەنى سەرکردایەتی لە شوباتی 2016 بەباشی زانی کە گۆڕانکاری لەتەواوی دامەزراوەکانی ناو پارتیدا بکرێت و پارتی بۆ قوناغی تازە ئامادە بکرێت، بۆ ئەمەش چەندان لیژنە بۆ چاکسازی و پێداهاتنەوە بە کار و هەیکەلیەتی ئۆرگانەکانی سەرکردایەتی و دامەزراوەکانی ناو پارتى پێک هات. لە کۆبوونەوەی ئەنجوومەنی سەرکردایەتی لە 8ىشوباتى 2017 سەرۆک ئەنجامی گۆڕانکاریەکانی راگەیاند کە هەمەلایەنەن لە کەسەکان و هەیکەل و شێوازی کاری دامەزراوەکانی کە گۆڕانکاری تێدا ئەنجام درا. بە پێی ئەو فیدباکەى لە ناو کادران و بنکەى حیزب وەرگیراوە، کادرانی پارتی دڵیان بە گۆڕانکاریەکان خۆشە و بە ئومێدەوە تەماشای دەکەن و چاوەڕێی ئەنجامى باشی لێ دەکەن و دەزانن کە تەنیا شوێنگۆڕکێ نیە.

ئه‌و گۆڕانكارییانه‌ی هاتنه‌ ئه‌نجامدان ته‌واو بوون یاخۆ چ گۆڕانكارییه‌كی تر ده‌كرێ؟
ئەوەی کە راگەیەنرا قۆناغی یەکەمی گۆڕانکاریەکان بوون، گۆڕانکاری تریش لەسنوری پارێزگای سلێمانی و کەرکوک ئەنجام دەدرێن و لە پارێزگای دهۆکیش ئۆرگانی تری سەرکردایەتی دروست دەکرێت.

ئایا له‌ گۆڕانكارییه‌كاندا هیچ كه‌س وه‌ك سزا مامه‌ڵه‌ی له‌گه‌ڵ كراوه‌ له‌ گۆڕین یاخۆ لادان؟
ئەم بابەتە لەلایەن کادران و چاودێرانی سیاسی و تەنانەت خەڵکی ئاساییش خوێندنەوەی جیاجیای بۆ دەکرێت، بەڵام سەرۆک بارزانى ئاماژەی بەوەدا کە گۆڕانکاریەکان پرۆسەیێکی ئاسایی ناو حزبن.


خه‌ڵك چاوه‌ڕوانی ده‌كرد پارتی به‌هۆی گه‌نده‌ڵی و زیاده‌ڕۆیی له‌ به‌كارهێنانی ده‌سه‌ڵات پارتی ژماره‌یه‌ك به‌رپرسی خۆی ده‌ربكات له‌ كاری حزبی دووری بخاته‌وه‌، به‌ڵام ئه‌مه‌مان نه‌بینی. ئایا به‌رپرسانی حزب ئه‌وه‌نده‌ پاكن؟ 
لەسەردەمێک دەژین کە بەهۆی زۆر هۆکار و ئامراز خەڵک راستیەکان دەزانێت و شاراوەیی تێدانیە، بە بڕواوە دەڵێم بەشی هەرە زۆری ئەو هەڤاڵانەی دەستنیشانکراون کەسانی پاک و دوور لە گەندەڵین، لێهاتوون لە بەجێگەیاندنی ئەرکە نیشتیمانی و حزبیەکانیان، خۆشەویست و خاوەن متمانەن لای خەڵک و بنکە و جەماوەری پارتی، وە لە هەمووى گرنگتر کەسانی ئەستۆپاکن بەرامبەر میللەت و پارتی. خەڵک دەتوانن جیاوازی نێوان کەسەکان بخوێننەوە.

ده‌كرێ بزانین له‌ناو پارتی ده‌ست به‌سه‌ر سامانی چه‌ند كه‌سدا گیراوه‌؟ كێن له‌ چ ئاستێكدان؟ جۆری گه‌نده‌ڵییه‌كانیان چی بووه‌؟
بۆ ئەم بابەتە لیژنەی چاکسازی هەیە، من زانیاری و داتام لانیە ، بەڵام گرنگ ئەوەیە کە هیچ ئاستێک حەسانەی نیە.

ماوه‌ی سێ ساڵه‌ كوردستان له‌ ته‌نگژه‌ی سه‌ختدایه‌ و ژیانی خه‌ڵكی ئاسایی ئاڵۆز بووه‌ به‌ ته‌واوی. حزبه‌كان به‌رده‌وام باس له‌ كۆبوونه‌وه‌ و نه‌خشه‌ڕێگه‌ و رێككه‌وتن ده‌كه‌ن، به‌ڵام هیچی نه‌گه‌یشت به‌ ئه‌نجام. به‌ نیازن تا كه‌ی خه‌ڵك به‌و حاڵه‌وه‌ رابكێشن؟ بۆچی هه‌ست ناكرێ خه‌مخۆری جددی هه‌بێ بۆ ژیانی خه‌ڵك؟
ئەوەی لەسەر پارتی بووە لەم بوارە ئەنجامی داوە، سەردانی هەموو حیزبە سیاسیەکانمان کردووە، پڕۆژەمان هەبووە بۆ دەربازبوون لە تەنگژەی سیاسی، سەرۆک بارزانی دەستپێشخەری کردووە و پەیامی خۆی راگەیاند و جارێکی تر مەکتەبی سیاسیمان سەردانی لایەنەکانی کردەوە. ئەم پرسیارە دەبێت لەلایەنەکانی تر بکرێت کە بۆچی هاوکار نابن بۆ دەربازبوون لەم تەنگژانە، هاوکار نەبوونی هەندێ لایەن بۆ دەربازبوون لەم تەنگژە سیاسیە ئەوەیە کەبەشێکیان لە تەنگژەی قوڵی سەرکردایەتی و پرۆسەى وەرگرتنى بڕیار و تەنگژەى جەماوەریدان، بەشێکیشیان وای دەخوێننەوە کە بەردەوامی تەنگژەکە لە خزمەتی ئەوان دایە لەڕووی جەماوەری و لەدژی پارتی بەکاری دێنن، ئەمەش خۆدزینەوەیە لە چارەسەری، دڵنیاین بەو ئاراستەیە نیە کە هەندێک خەونى پێوە دەبینن. جگە لە پرۆژەکانی پارتی، یەکگرتووش پرۆژەی هەبووە بەڵام دژی ئەو پرۆژیەش وەستانەوە .

ده‌توانی ده‌ستنیشانی بكه‌ن بۆچی ئه‌م حزبانه‌ رێك ناكه‌ون؟ ناكۆكییه‌كه‌یان له‌سه‌ر به‌رژه‌وه‌ندی حزبی و پاره‌ی زیاتره‌؟ یاخۆ له‌باره‌ی چۆنیه‌تی پێشخستنی ژیان هاووڵاتییان كێشه‌یان هه‌یه‌؟
پرسیارەکەت هەموو لایەنە سیاسیەکان دەگرێتەوە بە ئێمەشەوە، لە وەڵامی پێشترم ئاماژەم بە هەڵوێستەکانی پارتی کرد. لەبارەی بەلایەنەکانی تر، خوێندنەوەی جیاجیا هەڵدەگرێت، بەشێک لەو خوێندنەوانە ئەوەیە کە دەستی تریش رۆڵى لە قوڵکردنی ناکۆکیەکاندا هەیە و هەوڵدەدرێت بە درێژەدان بە ناکۆکیەکان، هەستی بێزاری و ناڕەزایی لای خەڵک زیاد بکرێت و ئاراستەی خەڵک لە پشتگیری ستراتیژ و پرۆژەی سەربەخۆیی و دروستکردنی دەوڵەت بگوازرێتەوە سەر خەریککردن بە گرفت و ناکۆکی ناوخۆیی و سەرەنجام بڵاوکردنەوەی نا ئومێدی و بڕوا بە خۆنەمان، بۆ ئەم مەبەستەش هەموو کارتە ناوخۆیی و دەرەکیەکان بەکار هاتوون و بەکاردێن. بۆ نموونە: هەڵوێستی پەکەکە و بەکارهێنانیان لەم ساتە وەختە و نیشاندانی هەڕەشەی رووبەڕووی بوونەوەی چەکداری و کۆکردنەوەی هێز، ئاشکرایە کە لەخزمەتی ئەجێندایەکی نا کوردستانیە، بەڵام دەبێت ئەوە بزانرێت کە پەکەکە پێشتریش خۆیان تاقیکردۆتەوە، بۆیە واباشە جارێکی تر خۆیان تاقی نەکەنەوە، چونکە هەمان ئەنجامیان دەبێت و دەبێت لە رژدیی پارتی بگەن، پارتی سوورە لەسەر پاراستنی کوردستان و ئەزموونەکەی و بەرەوپێش بردنی.

زۆرینه‌ی ئه‌م به‌رپرسیارێتییه‌ی كێشه‌كانی كوردستان ده‌كه‌وێته‌ ئه‌ستۆی پارتی و یه‌كێتی وه‌ك خه‌ڵك ئاماژه‌ی بۆ ده‌كه‌ن. ئه‌م دوو حزبه‌ بۆ وا بێباكن و رێك ناكه‌ون؟ كامیان خۆیان ناگونجێنن بۆ رێككه‌وتن؟
راستیەکە و نکۆڵی لێ ناکرێت کە پارتی و یەکێتی پێکەوە رۆڵی سەرەکیان هەبووە لەدروستکردن و بنیادنانی ئەم ئەزموونە و بەیەکەوەش تەحەمولی کەم و کوڕیەکان دەکەن. سەبارەت بە ئێمە هەرگیز لە پابەندییمان بەرامبەر خەڵک بێ باک نین و بێ باک نەبووین و نابین، کە حوکمرانی دەکەین بە تەواوی دەیکەین و بەرپرسیارێتی هەڵدەگرین، پێیەکمان لە حکومەت و یەکمان لە ئۆپۆزسیۆن و پێیەکیشمان لە بەغدا نیە. هەر کەس بە ئینساف لە هەڵوێستەکانی پارتی بڕوانێت سەبارەت بە رێککەوتن و دەرباز بوون لەو قەیرانە گلەیی لە پارتی ناکات.

یه‌كێتی گله‌یی ئه‌وه‌ ده‌كات كه‌ به‌شی كه‌مه‌ له‌ پۆست و ده‌سكه‌وت. مه‌لا به‌ختیار جار جار ده‌ڵێ ئه‌گه‌ر هاوسه‌نگ بینه‌وه‌ له‌گه‌ڵ پارتی رێك ده‌كه‌وین. ئایا پارتی چ به‌شێكی یه‌كێتی خواردووه‌؟ 
هیچ بەشێکی یەکێتی لای پارتی نیە. بەتایبەتی ئەگەر پێوەر رێژەی پۆستەکان بێت، بەپێی ئەنجامی هەڵبژاردن دەبێت رێژەی یەکیتی ١٦٪ بێت، بەڵام ٣٤٪ وەزیریان هەیە و٦١٪ بریکاری وەزارەتیان هەیە و ٤٠٪ بەڕێوەبەری گشتیان هەیە. ئەم بابەتە بریتی یە لە ژمارەی پۆستەکان لە حکومەت و ئەویش دیارە و شارەزایانی هەردوولامان ژمارەی پۆستەکان و ئستحقاقی هەرلایەک و ئەو رێژەیەش لەو پۆستانەی هەردوولامان کە ئێستا لەکارکردن دان لایان هەیە، بۆیە پێم وانیە پاساوەکە ئەمە بێت.


باشه‌ ئه‌گه‌ر دوای 25 ساڵ حكوومه‌تداری به‌رهه‌می فه‌رمانڕه‌وایی كوردی 50 به‌ 50 و هاوسه‌نگی بێ به‌بێ ره‌چاوكردنی ئه‌نجامی هه‌ڵبژاردن؟ پێتان وایه‌ كوردستان جێی دڵخۆشیی بێ بۆ ژیانی سیاسیی؟
25 ساڵ لە مێژووی میللەتان بەرە و حوکمڕانیەکی باش و شارستانی و قبوڵکردنی ئەنجامەکانی هەڵبژاردن وەک خۆی کاتێکی زۆر نیە، هەرچەندە نامەوێت پاسا و بۆ کەم و کوڕیەکان بێنمەوە بەڵام لەم 25 ساڵەدا بارودۆخی کوردستان زۆر نا ئارامی و ناسەقامگیری و کەرت بوونی تێدابووە و هەمووی بەسەریەکەوە ئەزموونی حوکمڕانی سەقامگیر نەبووە، ناکرێت هەرێمێکی بێ سەروەری کە ئێستاش بەشێکە لە وڵاتێکی قەیراناوی و بەردەوام لەبن هەڕەشەی دەرەکی دایە، لەگەڵ ووڵاتانی سەقامگیر بەراورد بکرێت.

پێتان وایه‌ خه‌ڵك به‌رده‌وام ته‌حه‌مولی ئه‌م دۆخه‌ ده‌كات؟
راستە دۆخەکە ناخۆشە و گرانە، بەڵام خەڵک لەلایەک و ئێمەش لەلایەکی تر نین، جەماوەر و ئەندامانی پارتیش لەبەرەی خەڵکن و هەموومان پێکەوە بەرگەی ناخۆشیەکانمان گرتووە و بە یەکەوەش لێی تێپەڕ دەبین.


 پارتی و گۆڕان جارێكی تر ده‌توانن پێكه‌وه‌ حوكم بكه‌ن یان ئه‌و ئه‌زموونه‌ی رابردوو یه‌كه‌م و دوا ئه‌زمون بوو؟
هەر چەند لە سیاسەت دۆستی بەردەوام و دژی بەردەوام نیە، بەڵام ئەزموونی حوکمڕانی و رێککەوتن لەگەڵ لایەنێک بەردەوام دەبێت کە ريز لە رێککەوتنەکان بگرێت ، بوێری بڕیاردان و تەحمول کردنی بەرپرسیارێتی هەبێت و بتوانێت سەرکردایەتی شەقام بکات و لەپێشەوەی خەڵک بێت, نەوەک بە پێچەوانەوە.

رۆژنامەی وشە ژمارە ١٧٩ لە ١٥ ی ئاداری ٢٠١٧

Popular Posts